युगबोध समाचारदाता
तुलबहादुर कँवर मगर
सिसहनियाँ । राप्ती गाउँपालिका वडा नम्बर २ कटाहामा मजदुर लक्षित चार महिने वित्तीय साक्षरता कक्षा शुरु गरिएको छ ।
क्रियटिङ पोसिबिलिटिज (सिपी) नेपालको आयोजना र राप्ती गाउँपालिकाको समन्वयमा सञ्चालनमा आएको उक्त कक्षाको गाउँपालिकाका अध्यक्ष प्रकाश विष्टले शुभारम्भ गर्नुभएको थियो । कार्यक्रममा अध्यक्ष विष्टले मजदुरहरूको जीवनस्तर उकास्न आधारभूत लेखपढ र व्यवहारिक ज्ञान प्रदान गर्न कक्षाले महत्वपूर्ण भूमिका खेल्ने बताउनुभयो । ‘आफ्नो कमाइको सही व्यवस्थापन, बचत, लगानी र आर्थिक सुरक्षाको ज्ञानमार्फत श्रमिकहरूलाई आत्मनिर्भर र सशक्त बनाउने हाम्रो उद्देश्य हो’– उहाँले भन्नुभयो ।
राप्ती गाउँपालिकाका प्रवक्ता तथा वडा नं. २ का अध्यक्ष पहलवान चौधरीले श्रमिक वर्गले लेखपढ र हिसाब किताब नजान्दा भोग्नुपरेका समस्याबारे चर्चा गर्दै यस कक्षाले उनीहरूको दैनिक जीवनमा सहजता ल्याउने विश्वास व्यक्त गर्नुभयो । ३० जनाको सहभागिता रहेको साक्षरता कक्षाको सहजीकरण अस्मिता चौधरीले गर्नुभएको थियो । सो
अवसरमा कक्षामा सहभागीहरुलाई शैक्षिक सामग्रीहरु समेत वितरण गरिएको थियोे ।
Comments